اكسر الملل

بيعدى الزمن وبنترك الحياة بدون ما نسيب فيها أى بصمة لأننا مبتقدرش نستثمر وقتنا في الحاجة اللى بنحبها . لو افترضنا ان متوسط حياة الفرد حوالي 60 سنة منهم حوالي 10 سنين فترة الطفولة اللي بتكون غالبا مش مدرك فيهم أوي لتفاصيل كتيره وبيكون ادراكه ونضجه غير مكتمل  كده متبقي  50 سنة . لو افترضنا اننا بننام متوسط 8ساعات في اليوم يعني حوالي 17سنة من الخمسين. كده حوالي 45 %من حياتك مش بنعمل فيهم حاجة . ممكن نضيف عليهم أكلك وشربك ومواصلاتك . ده بينتهي بينا الحال اننا بنموت ونترك الدنيا من غير ما نسيب فيها أى  أثر

  ولأن أنأ طالب في مدينة زويل بنكون دائما مطالبين بشكل مستمر بتكليفات متلاحقة زى الأسيمنت والميدترم . ده بيخلينا نعيش حياتنا بطريقة مملة وروتينية وبنعمل كل يوم نفس الحاجة بنفس الطريقة ونفس الأسلوب  . تصحي كل يوم في نفس الميعاد تيجي تحضر المحاضرات وتحل الاسيمنت ترجع البيت تاكل وتذاكر و تنام. ده بيخلينا نموت وندفن جوانا حاجات كتير حلوة بنعرف نعملها وبنحبها بسبب ضغط وزحمة الحياة. ده بيؤدى اننا بنعيش الجزء القليل المتبقي من حياتنا بشكل استهلاكي للوقت وبيجعل معظمنا يعيش في حالة ملل بل واكتئاب. محاولة الخروج من هذا النطاق بيتطلب مننا اننا ندرك أولوياتنا في حياتنا  ونختار ما  بين الحياة اللي عاوزنها وبين الحياة اللي الواقع بيحاول يفرضها علينا