8فبراير2015

فى يوم احداث ستاد الدفاع الجوى .. كنت ساعتها هنا فى اكتوبر لأنى كان عندى شغل فى الجامعه .. كانت ساعتها أجازة نص السنة .. قررت بما أنى موجود فى اكتوبر ان هروح اتفرج على الماتش بين (الزمالك_ وانبي) .. قبلها كان الماتشات كلها من غير جمهور .. وكان الماتش ده هو بداية دخول الجماهير .. ورئيس نادى الزمالك دعا الجماهير انها تدخل الماتش .. فعلا الأولتراس جهز نفسه علشان يروح يهتف ويشجع من تانى .. وناس كتير مش أولتراس جهزت نفسها علشان هتروح وأنا كنت منهم .. الداخلية أخدت احتياطاتها وعملت ممر حديد حوالى متر عرض فى مترين ارتفاع علشان تدخل منه الجمهور للاستاد وكأنهم حيوانات بالظبط مش بنى آدمين ... المهم انا طول الوقت كنت على التليفون مع صاحبي الى هيقابلنى على هناك .. ركبت العربية الطريق زحمة جدا جدا .. فى حادثة فى الطريق ... مش هلحق أوصل ستاد الدفاع الجوى ( مدينة نصر ) وانا فى اكتوبر .. لازم اشوف الماتش .. قررت انى خلاص مش هروح وانى يدوب هلحق ارجع البيت فى اكتوبر علشان الماتش فاضل عليه ساعة بس .. بدأ الماتش .. وبدأت الأحداث .. عدد الجماهير كبير .. تزاااحم كبير .. ممر ضيق جدا .. الداخلية بتضرب خرطوش علشان تفرق الناس ..  حصل اختناق .. حصل موت .. ناس أبرياء ماتوا علشان اتضحك عليهم .. علشان سوء تخطيط .. زعلت أد ما فرحت .. زعلت على الناس الى ماتت .. فرحت علشان الطريق كان زحمة وانى مروحتش وربنا نجانى .. الحمد لله .. كلمت صاحبي وقالى انه بخير ومحصلوش حاجه .. المدينة بعتللى رسالة غير مباشرة .. عطلت الطريق .. علشان انا مروحش .. علشان مبقاش واحد من الى ماتو.
20 شهيد فى الجنة .. ((كان آخر صوت أفتح بنموت بيهز سكوت .. فجأة الجو اتملى دخان والخرطوش فى كل مكان .. أفتح بابك لم كلابك ناس بتموت يا ضعيق يا جبان ))