الخيل،، وملعب الكورة..

في الطريق على أطراف المدينة، في ملعب كورة اتعمل جديد، أنا عمري ماشفته فاضي أيًا كان الوقت اللي مسافرة فيه، دايما في ناس بتلعب من أعمار مختلفة..

أنا بحب الملعب ده جدًا – بغض النظر عن انه مبني على أرض زراعية، وده حاجة ممكن نتكلم فيها بعدين - ، بس المكان ده بالنسبة لي بيمثل اعتراض الناس على الحياة اللي مضطرين يعيشوها، بيمثل إدراكهم لرغابتهم وحقهم في الترفيه والمتعة مهما كانت الحياة قاسية أو مُتعبة..

كمان في الطريق في وسط الصحرا، بقيت باشوف ناس بتركب خيل، دايما باشوفهم ومعظمهم ولاد صغيرين، بالنسبة لي الحاجات ده مبهجة جدًا.

وعي الناس العادية بحقوقها مهما كانت صغيرة، وبحثهم عن حياة أفضل وظروف آدمية أكتر ده حاجة عظيمة جدًا ، وأعتقد أنها أساسية جدًا لأي تغيير حقيقي في المجتمع.

معرفش ده ليه علاقة بلغة المدينة ولا لأ، بس اللي لفت نظري انه الملعب مبني برة المدينة مش جواها، والناس بتمارس هوايتها في ركوب الخيل بردو برة حدود المدينة في الصحرا، وكأنه المدينة بتمثل التعب والشغل والزحمة بس، عشان ننبسط لازم نطلع براها..