ذكريات شقة اكتوبر الهباب :v
كنت عايشة في مدينة بلبيس قبل ما اسكن في اكتوبر علشان الجامعة. مدينتي مختلفة كتير عن اكتوبر علي الرغم من قِصر الفترة اللي قعدتها في اكتوبر صحيح إلا إني مَدينة لها بالكثير دة كفاية انها علمتني اعتمد علي نفسي في حاجات اكتر مما اعتدت في العادي
حتي وان كانت تبدوا حاجات بسيطة بالنسبة للي علمتهولي بلبيس إلا انها حاجات جديدة ومختلفة بالنسبة ليا.
يعني دي علمتني ازاي اكون مسؤلة عن نفسي وعن الشقة اللي عايشة فيها اكتر و اكتر بداية من ازاي أدور علي شقة او سماسرة علشان أأجر الشقة لإزاي اتصرف لما الانبوبة تفضي  :3 او لو الكهربا اتفصلت علينا من شركة الكهربا نفسها لان المحصل بيجي  كل مرة واحنا في الجامعة :3 او لو محتاجة اوصل خط ارضي او انترنت او لو تعبت اروح للدكتور لوحدي حتي !
اكيد ماما وبابا بيساعدوني بس اكيد مش بشكل كُلي لبُعدهم.
الحاجت دي كلها انا ممريتش بيها قبل كدة في مدينتي وحاجات جديدة عليا ومختلفة علمتني كتير خصوصا ان مليش قرايب في اكتوبر فكنت بضطر اعتمد علي نفسي.
مش هحكي علي الشقة اللي رجعت لاقيت بابها مفتوح تقريبا الحرامي ملاقاش حاجة يسرقها فنفد بجلده ومهانش عليه يقفل الباب اللي طفشه :D
#الغربة_وسنينها
#شكراً_اكتوبر