مفهوم التعايش

اذا قررنا ان المدينة اللي بنعيش فيها هي عبارة عن حدود معينة تفصل مساحات عن بعضها, ساعتها المدينة مش هتكون اكتر من شوية خطوط على الخريطة. وساعتها المدينة مش هتدينا اي انطباع عن اي افكار داخل حدودها, ولكن اذا تخلينا عن فكرة الحدود وفكرنا في فكرة اعمق من كده وهي فكرة ان شوية ناس بيربطهم ببعض رابطة او فكرة او ايمان او عقيدة معينة اتجمعوا في مساحة معينة واطلقو على نفسهم اسم معين, في فكرة تانية ان شوية ناس مش بيربطهم ولا رابط من اللي فاتوا دول بس هما لقوا نفسهم شوية بني ادمين  محتاجين يلاقوا سبل الحياة وادركوا انهم لازم يبقوا مع بعض عشان ده في قوتهم واستمرار لحياتهم فقرروا انهم يعيشوا مع بعض في مساحة معينة وسموها مدينة. من النقطة ديه ممكن نلاقي ان المشكلة مش في مفهوم المدينة ولا ان شوية بشر عايشين في مساحة ايا يكون هما اصطلحوا يسموا المساحة ديه ايه سواء قرية, مدينة ولا حتى حارة المشكلة الكبيرة هي في مفهوم التعايش.
يعني احنا مثلا لو جيبنا نفكر ان العالم بقى مكان صغير جد ا جدا وان احنا كل يوم واحنا ماشيين في الشارع بنلاقي اللي جاي من أسيا واللي جاي من امريكا واللي جاي من بلا بلا بلا........ وان الناس دول عايشين في نفس المساحة اللي اهلك واجدادك اصطلحو على تسميتها ومفيش اي حاجة مشتركة مابينك ما بين الكائنات الغريبة ديه, بس الحقيقة ديه مش هتغير من انهم يستمروا في العيشة معانا, الفكرة ديه هتخلينا نفكر في مفهوم تاني اللي هو مفهوم التعايش.
التعايش ده احنا ممكن نقعد قعدة او قعدات كتير ونقسمه بس مش هنخلص بس ممكن نسيب كل ده تحت مظلة التعايش الادمي والانساني, يعني احنا كلنا بني ادمين سواء بقى انت مسلم وانا مسيحي ولا بوذي ولا هندوسي المشكلة احنا هنتعامل ازاي مع بعض الحيقية لو فكرنا هنلاقي ان كل الحاجات ديه تفاهات يعني ايه شوية ناس خلفوا طفل وقرروا انه هيطلع بيعبد كذا ديه ليه تبقى مشكلة ان ديه تحدد على اساسه هو هيعيش فين ولا هيدخل مدرسة ايه ولا هيصاحب فلان وليه ميصاحبش فلان. يعني الحياة ابسط من كده بكتير..... نكمل المرة الجاية.