اتثبت قبل كده ؟!

  بعد ثورة 25 يناير زاد الانفلات الأمني وزادت أعداد البلطجية في الشوارع  نتيجة تراخي الشرطة في ملاحقة المجرمين اللي هربوا من السجون أو نتيجة ان فيه ناس كتير اتجهوا للبلطجة. ظهرت في الخمس سنين الأخيرة ظاهرة اسمها "التثبيت" وهي ان يخرج أشخاص مسلحين على مواطن أعزل ليستولوا علي كل اللى معاه.
في مرة كنت راجع من الجامعة الساعة 8 مساء وأنا راجع للبيت بتمشي شوية لحد ما أوصل للبيت . فجأة قرب مني توكتوك واحد سايقه وواحد تاني راكب وراه
 وقالي : الساعة كام يا برنس .
قلت له: والله مش معايا ساعة وموبايلي فاصل شحن ونزل الشخصين من التوكتوك وباين عليهم انهم شاربين حاجة  وواحد منهم طلع سكينة أو مطواة وحطها تحت رقبتي والتاني واقف مستنيه وقالي: طلع اللي معاك. قلت له وأنا مرعوب  مش معايا حاجة غير الموبايل ده
قالي: طلع ياله كل  اللي معاك
قلت له والله ما معايا غير الموبايل لو معايا فلوس كنت ركبت توكتوك
سابني وركبوا الاتنين التوكتوك ومشيوا بسرعة جدا وأنا واقف مكاني في حالة من حالات الرعب والذهول . مع العلم ان كان معايا اللاب توب و فلوس في المحفظة لكن كدبت عليهم
أثناء الثواني دي حسيت بشعورين مختلفين : احساس الخوف من الأذي اللي ممكن يصيبني واحساس الرفض  والكره للموقف وده اللي دفعني ان اكذب عليهم واقولهم ان معيش حاجة  علي الرغم من احتمالية الاذي اللي ممكن يصيبني نتيجة كده
رجعت البيت وأنا في حالة ذهول  ومش قادر أتخيل المصير اللي ممكن أى حد مننا يواجهه