حُبى للمدينة

دايما لما بركب المواصلات، بحب أقعد جنب الشباك عشان أتفرج ع الناس و المحلات و الشوارع و الإعلانات، حتى لو كان الطريق اللى بتفرج عليه ده حافظاه و بعدّى عليه كل يوم.
لما بروح مكان جديد عليا، بكون منبهرة دايما و اقول ف نفسي: "قد ايه انا بحب القاهرة!" مع ان مش بيكون فيه داعى للانبهار أو حاجة غير مألوفة.لحد دلوقتى مش عارفة ايه سبب حبى للمدينة.
من الحاجات اللى لفتت نظرى فى المدينة: من أسبوعين كنت ماشية فى شارع رمسيس، ف حتة كدة قريبة من غمرة، و لقيت بنت راكبة عجلة و ماشية بيها فى الشارع. لما شوفت المنظر ده فرحت جدا و اتمنيت ان كل بنت بتحب ركوب العجل تعمل زيها و قررت أحوش و أشترى عجلة :D.