-هنقعّد أربعات يا ابلة.
الزمان: يوم من أيام الخميس او نهاية الأسبوع
المكان: موقف العاشر
أكيد طبعاً كبنت هواجه مشكلات للعيشة لوحدي أو للسفر لوحدي أكتر من الولد .مثلا يعني نهاية كل الأسبوع بروح الشرقية بالمواصلات فالمشكلة اللي كانت بتواجهني هي اني أحياناً مبلاقيش مواصلات والمَوقَف بيكون زحمة جداً. فبضطر اني انسحب او أتراجع للوراء في حالة لو الزحمة دي رجالة وكدة.
بس ساعات المَوقَف مبيكونش زحمة لهذه الدرجة البشعة ولكنه مازال بشعا :3
بشع بالدرجة اللي تخلي السواقين يستغلوا الموقف جدا ويقعّدوا 4 في الكنبة الواحدة بدلاً من 3
 لحد هنا الموقف مش مأسوي أوي لكن لما تعرف ان السواق عاوز يركب 4 في الكنبة 3 منهم رجال و انا الرابعة والوقت هيتاخر بليل لو نزلت واستنيت عربية تانية تيجي. مش عارفة هتيجي ولا لا او هتيجي امتي!!
هنقعد أربعات يا أبلة. هنقعد أربعات يا أساتذة :V .
- يعني انت عايزني اركب مع 3 رجالة ازاي يعنى؟
-مش مشكلتي يا ابلة يالا خلينا نطلع .هتركبي يا آنسة؟
اكيد يعني مش هركب بالطريقة دى .حسبنت عليه في سري "خلاص،أنا هدفع مكانين"
-يلا يا هندسة اطلع عربيتك كملت *بصوت التبّاع.
ركبت في سلام علي الكرسي القلّاب لوحدي والكنبة اللي جنبي فيها اتنين كالطبيعي مش 3.
ما هو يا اما أدفع اتنين  يا إما أروح بيتنا متأخر(سواقون جشعون إلا من رحم ربّي)
بلبييييس بلبيييس بلبييييييس :V