عمو اللي بيوزع يونبوني

من أكتر الحاجات الحلوة اللي كنت متعودة اعملها قبل مااجي الجامعة اني كنت بنزل اجري كل يوم الصبح في تراك النادي, كنت من 3 سنين بنزل كل يوم بعد شروق الشمس كان التراك فيه دبابات كتيره والعساكر في الوقت ده كان اغلبهم بيبقوا نايمين جوا الدبابات واللي مش بيبقى نايم كان بيصحى يعاكس البنات اللي بتجري وبعدين يرجع يكمل نوم, المهم كنت بنزل كل يوم انا وماما هي كانت بتمشي وانا كنت بجري وكان فيه راجل عجوز جدا جدا كان بيروح قبل ماانا اوصل وبيمشي بعديا وكان بيجري اكتر مني وانا كنت بغير جدا من الحوار ده وبعدين الدراسة بدأت في الجامعة وانا سافرت ومنزلتش بقالي 3 سنين.

النهارده قررت انزل تاني مشيت من نفس الطريق اللي بيوصلني على النادي وبعدين جاية ادخل التراك الكبير لقيتهم قفلوه, دبابات كتيره جدا مرصوصة جوا التراك ومكتوب عليها قوات حماية المواطنين والحتت اللي مش فيها دبابات كانت متكسرة فعشان كده روحنا نجري في تراك ملعب الكورة.

الشئ المبهر في الموضوع ان اغلب اللي كانوا بيجروا وبيمشوا ده اذا مكنش كلهم من الفئة العمرية مابين 50 ل 70 وكان فيهم عمو كبير وعجوز كدا بيوزع على الناس اللي بتجري بونبوني بالقهوة. فاول ماشافانا انا واختي النهارده قالنا صباح الخير وادالنا البونبوني وقالنا"من جاور السعيد يسعد" واتصور معانا.

فصباح الخير