من الأجرة 75 قرش للأجرة 17 جنيه

من 6 سنين اول ما بدأت ثانوية عامة كنت بركب مواصلة اجرتها 50 قرش وعشنا فترة من الزمن في سلام مع سواقين الميكروباص ،في يوم من الايام فجأة وبدون اي مقدمات او اسباب نلاقي صوت يصيح اول ما نركب الاجرة 75 قرش يا حضرات، فتتعالا الاصوات احتجاجا ليه 75 قرش هي 50 قرش ولو مش عاجبك هننزل فيرفض السواق ال 50 قرش وتنزل الناس وتجيب عربيات تانية تروح علشان تروح للمكان اللي هي عايزاه.............. ثانية واحدة (مش دا اللي حصل بالظبط)، اللي حصل ان صوت او مجموعة اصوات من بعض المراهقين هي التي تعلو احتجاجا والباقي صامت، والمراهقون هم من ينتصرون في هذه الجولة ولكن في الحرب جولات اخري حيث يجد المراهقون انفسهم متأخرون علي دروسهم فيخسروا تلكم الجولات، ثم تأتي الانتفاضة بعد ان وجد المراهقون ان جميع الناس ضدهم حتي هؤلاء من الكادحين الذي حمل المراهقون شعلة المناداة بحقوقهم ورفض ظلمهم، جاءت بعد ان وجد المراهقون انفسهم يتركون الميكروباص تلو الاخر رافضين دفع الزيادة مذهولين بدفع الناس للزيادة دي بدون اي اعتراض، لا والاهم بقي انهم بدأوا يتهموا المراهقين دول انهم بعطلوا مصالحهم، في هذه الانتفاضة قام المراهقون بقفل الطريق بالحجارة والكاوتش اللهم الا مكان ضيق جدا سدوه باجسامهم علشان يعدوا العربيات العادية اللي مش اجرة، وبعد شد وجذب تليفوني يرن (كنت انا قائد فرقة المقاومة) واذا به والدي يأمرني بالذهاب للمنزل وانا اعترض واتحجج بان عندي امتحان مهم في الدرس واللي مش هيحضر هيتطرد من عند المدرس دا (كان فيه امتحان فعلا بس كنا عاملين حسابنا وخارجين بدري)، كلنا سواقين من اماكن تانية ووصلنا الناس لحد المكان المطلوب بأجرة 50 قرش بس، في الاخر خالص ركبنا احنا عربية مع بعض وروحنا الدرس واخدنا الامتحان ورجعنا لبيوتنا وحانت لحظة المواجهة، والدي رجع من الشغل صحاني من النوم متهما اياي باني مديت ايدي علي راجل كبير يبلغ ال 50 او ال 60 من العمر، رفضت التهمة وخليته يكلم الراجل نفسه يتأكد منه وتمت تبرأتي وعدت المواجهة دي بسلام، كان كبير السواقين هو جارنا (الباب في وش الباب) كل يوم يقول لوالدي سكت احمد او خليه هو يدفع ال 50 قرش ومالوش دعوة بالناس او مايدفعش خالص (اغراءات كنت ممكن اقتنع بيها لو كانوا هيجيبولي سندوتشات الفول والطعمية)، رفضت واستمرت الثورة الي ان نجحت وحققت مطالبها الاجرة 50 قرش واستمرت هكذا لحد ما خلصنا ثانوية عامة، الطريف بقي ان من فترة قريبة اضطرتني الظروف اني اركب نفس المواصلة لقيت الاجرة جنيه ونص حين ان الاجرة الرسمية الان 75 قرش فقط، انا بقي نقلت الحدث لمكان جديد من بني سويف لاكتوبر الاجرة 16 جنيه، يوم السبت اللي فات بعد مامشينا حوالي 20 كيلو السواق كان عايز يغير طريقه ويمشي زراعي مش صحراوي طبعا اعترضنا احنا راكبين صحراوي قال خلاص همشي صحراوي والاجرة 17 جنيه الناس بدأت تقول ماشي قولتله لا انا معترض بقي وهتمشي صحراوي ب 16 جنيه قاللي بس انا شاحن زراعي سألت الناس قالوا لا انت شاحن صحراوي ياسطي قولتله هتمشي صحراوي و 16 جنيه لو مش عاجبك رجعني الموقف قال خلاص هرجعك الموقف وكلمة من هنا كلمة من هنا اخيرا لقيت شاب من سني او اكبر شوية قال انا كمان عايزك ترجعني الموقف او هتمشي صحراوي ب 16 جنيه وبالفعل السواق لف ورجعنا الموقف وكلم واحد في التليفون حكاله انا قلت بس هناكل ضرب في الموقف للصبح بس عدت بسلام والسواقين يكلمونا علشان ندفع ال 17 والبنزين بيفرق من الطريق دا للطريق دا بس في الاخر الحق مشي ونزلنا كلنا ركبنا عربية تانية مشيت صحراوي و 16 جنيه، ومازالت الثورة ضد السواقين مستمرة.