مشهد الجمال المُتكرر

من المشاهد المُضحكة المُبكية بالنسبة لي ؛ إنه فيه 6 أشخاص تقريباً طاعنين في السن ديماً بيصلوا على الكراسي إللي في آخر المسجد عشان مش بيقدروا يصلوا واقفين، فـ فيه واحد منهم ديماً بيدخل المسجد آخرهم في صلاة الفجر، ما بين الأذان و الإقامة كده ؛ فيدخل المسجد بلهفة شديدة جداً واضحه على ملامح وجهه المُجعّد و يُلقي أول سلام في بداية يومه عليهم، و أول ما يفعله هو إنه يجري على صُحبَته الـ 5 دوُل و هم يقرأون القرآن، ويُسلم عليهم واحد واحد كسلام حد راجع من السفر، و يكرر جملة واحدة فقط بصوت مُرتجف "بركة إنك بخير" ؛ و كأن إحساسه بيخترق قلبي و كأنه بيقول لكل واحد فيهم " الحمد لله إني شُفتك النهاردة، يا عالِم مين فينا إللي هيقابل ربنا بكرا و مش هيشوف التاني من تاني ؟! " 

الغريب كمان في الناس دي إن فيه منهم اللي بييجوا من بعيد يسلموا عليا كل يوم كاننا أصحاب و هما ميعرفوش حتى اسمي و منهم اللي بيناديني عبد الرحمن. أنا عن نفسي مراجعتش أي حد فيهم ناداني عبد الرحمن، مش هتفرق كتير. المهم ابتسامة الصبح و صفاء النفس.