ليه أو ازاي حالنا بقى كده؟؟

من  أيام ما كنت في ثانوية عامة وأنا بحلم أدخل مدينة زويل، مكان المدينة دي بالنسبة لي كان كل شيء في حياتي ، كوني التحق بيها كان يعني لي فعلا نهاية الألف ميل اللي خطواته كانت 12 سنة تعليم مالهومش تماما. أنا ماكنش تقريبا لي أي هدف قبل ما اعرف المدينة دي، ومن ساعتها وأنا كنت بقرب من ربنا جدا عشان ادخل الجامعة دي على أساس إن هي أملي في إني اتعلم تعليم محترم وانفع بيه نفسي وبلدي وخصوصا بلدي دي كنت باني آمال كتيير قوي  على الجامعة دي عشان اطور التعليم والشباب والصحة في مصر لحد ماجالي ايميل القبول من الجامعة وما كنتش مصدق نفسي والفرحة لا تسعني حقا ونزلت ساجد شكر لربنا ده غير فرحة البيت كله وكده. لكن ... أنا مش عارف ايه اللي حصل بعد تقريبا سنة واحدة في الجامعة أنا ما كنتش حاسس أو عاوز اعمل أي حاجة من اللي كانت في بالي أو دماغي !! فين فرحتي بالجامعة فين احساسي بانتمائي للمدينة دي فين قلقي على البلد واني لازم اساعد في نهضتها واني مسؤول فعلا عن ده كله؟؟!! فين .. فين ..فين ؟؟ كله اختفى ورا برود غريب بقى بيسيطر علي وعلى معظم الطلبة . بقت نظرة كل واحد للمدينة أو حتى بلده مجرد نظرة تعتريها كل درجات البرود بعد ما كانت نظرة أمل وتحدي لمواجهة كل المشاكل في سبيل البلد بقى خلاص كل واحد بيبذل قصارى جهده عشان يطلع من البلد دي. ليه أو ازاي حالنا بقى كده؟؟