عايشين في القطر

أوقات كتير كنت بحب أركب القطر رغم الزحمة عشان القطر تقدر تكون فيه قريب من الناس بخلاف العربية الي بيكون كل واحد في حالة.
قطر منوف ودا القطر الي إتعودت أركبه هو قطر مختلف عن كل القطارات. كل عربية ليها روادها وكل ميعاد ليه ركابة.
ناس تقريبا عايشة في القطر، حفظين كل حاجة عن القطارات. هم كل يوم رايح جي فيه.
كنت ديما بسأل نفسى هو ازاى الناس دول راضين بالعيشة دي. يصحوا الصبح الساعة خمسة يركبوا القطر عشان يلحقوا شغلهم في  القاهرة الساعة 8. يرجعوا في قطر 5 بالليل عشان يوصلوا بيتهم الساعة 8 برده. يدوبك يتعشوا ويناموا. عشان يقدروا يصحوا بدري من جديد.
حياتهم هي عبارة عن ذلك الروتين.
الغريب ان الروتين دا بيورث ، يعني كل سنة بتنضم مجموعة جديدة لعائلة القطر. وبيكرروا نفس دورة الحياة ومحدش منهم بيحاول يغير من وضعه.
وللسبب دا فالقطر مجتمع كامل الناس تقريبا كلهم عارفين بعض ، رغم انهم من بلاد مختلفه، مهم بيقضوا مع بعض كل يوم تقريبا خمس ساعات.
حكاويهم مبتخلصش ومواقف القطر الغريبة ملهاش حصر.
-
الحقيقة الكلام عن القطر مينفعش يتقال في منشور واحد ، لإن القطر هو إنعكاس لكل تفصيلات المجتمع ، الحكاوي عن القطر مبتخلصش. وفي رأيى إن من أفضل الطرق لفهم أي مدينة هو إنك تركب القطر بتاعها وتسمع الناس.
-
عشان كدا قررت أكتب كذا منشور عن القطر كوسيلة لعرض لغة المدينة وفهمها..