بالنسبة لمحافظات فقيرة في مصر، أكتوبر تبدو مدينة جميلة ونظيفة وراقية، مافيهاش بقى الشوارع المتكسرة والمجاري الضاربة والحفر والكلام ده، بس بالنسبة لي الكلام ده حقيقي في أحياء وأحياء لأ، يعني اللي يروح الحي السادس مثلا مش هيفرقه كتير عن أي مكان تاني في مصر، نفس الشوارع والمجاري والحفر والعمال الغلابة والبياعين اللي على الرصيف

مش بس الحي السادس اللي بيفضح حقيقة المكان، وبيقول انه صعب جدا تعزل مكان في البلد عن الظروف والأوضاع العامة، يعني صعب تعمل مدينة كويسة وجميلة في بلد معظم ما فيها بعيد كل البعد عن أي جمال، ميدان الحصري كمان بيقول كده، مركز المدينة، الميدان ده فيه كل التناقضات، فيه كل أشكال وطبقات البشر، فيه طلبة الجامعة المرفهين جدًا اللي راكبين أحسن عربيات، وفيه الشباب اللي بيكافحوا ويشتغلوا، وفيه السوريين اللي بيحاولوا يعيشوا بأي طريقة بعد ماسابوا بلدهم، فيه العيال الصغيرين اللي بيشحتوا، وفيه سواقين العربيات الأجرة، وفيه بايعين الذرة، وفيه عمال اليومية اللي بيقعدوا طول النهار في الميدان ومعاهم عدتهم على امل انه حد يطلبهم في أي شغلانة

الميدان بيعبر عن كل دول، وبيفضح اللي الأماكن "الراقية" بتحاول جاهدة انها تخبيه أو تغطي عليها، الميدان بيحطنا قدام الحقيقة، قدام عمال اليومية والشحاتين اللي بنعدي من قدامهم واحنا مش عارفين اذا كنا احنا ظلمناهم ولا هم ظلمونا، احنا ظلمناهم باننا خدنا حقهم بشكل غير مباشر ومش بندافع عن حقوقهم او عن توزيع أكثر عدلًا للموارد، ولا هم بيظلمونا لما بيستسهلوا ويعيشوا على تعاطف الناس بدل ما يدوروا على شغل اكتر كرامة وحفظ لحقوق الناس، بيحطنا قدام الناس السوريين، هم دول لما جم خدوا فرص كان حد مننا هيستفيد منها، ولا احنا اللي كسلانين وهم يستحقوا يشتغلوا عشان مجهودهم وشطارتهم، وهكذا بقى،،، وفي الآخر مش بنوصل لحاجة كالعادة، غير انه المرور في الميدان ده مرهق ومؤذي