حلم الهجرة ويوم في الأميدايست

معظم الشباب اللي في جيلي وأنا منهم من أولويات طموحاتهم انهم يهاجروا لأوروبا أو أمريكا أو الخليج أو أي دولة من الدول اللي تسمي بالدول المتقدمة. اتكلمت مع مجموعة منهم داخل الجامعة وخارجها ولقيت ان أسبابهم تقريبا واحدة للهجرة وهي ان مفيش البيئة المناسبة اللي يعرف يشتغل فيها و في نفس الوقت عاوز يعيش حياة مادية كويسة.
كان فيه من حوالي 4 شهور منحة مقدمة من السفارة الأمريكية اسمها SUSI غرضها التبادل الثقافي والفكري ومدتها تقريبا 4 أسابيع. كانت المنحة بتشترط انها تكون للطلبة اللي لسه بيدرسوا ويكونوا ليهم مستوي معين في اللغة الانجليزية بيحدده أكتر من اختبار منها اختبار بيتعمل في الأميد ايست ب 100 جنيه. قدمت علي المنحة وروحت الاميد است عشان امتحن الانجليزي لقيت أعداد هائلة من الشباب الجامعي اللي بيحلم انه يخرج بره البلد بأي طريقة. كعادة أي مكان في زحمة في مصر كان لازم أقف في الطابور عشان أحجز يوم أجي امتحن فيه. روحت أمتحن فوجئت بأعداد كبيرة جدا من الطلبة غير اللي كنت شايفهم بيحجزوا منهم حوالي 15 واحد من جامعتي. لفت انتباهي واحد جاي من أسيوط من الصعيد اللي قطع مسافة حوالي 400 كم عشان ييجي الأمد ايست يمتحن ويقدم علي المنحة. اتكلمت معاه وعرفت انه صحي من قبل الفجر بساعة وخد القطار عشان يوصل لحد القاهرة في رحلة طويلة وقولت له يعني انت ليه مقدم علي المنحة؟ قالي أهو أي حاجة تخرجني بره البلد دي. سألته اذا كان ناوي يرجع مصر يعني لو اتقبل؟ قالي لأ طبعا عمري ما أرجع